من كام سنة وإحنا كل يوم نسمع الجملة السحرية اللي بقت شماعة لكل فشل وكل تعطيل مصالح:
“السيستم واقع”.
جملة قصيرة، لكنها كفيلة توقف مصالح ناس، تعطل معاشات، تأخر تأمينات، تربك بنوك، وتبهدل مواطنين مالهمش ذنب غير إنهم عايزين خدمة من دولة المفروض إنها بتتحول رقمياً.
اللي بيحصل دلوقتي مش تحول رقمي…
اللي بيحصل “فوت علينا بكرة” بنسخة إلكترونية.
الموظف اللي مش عايز يشتغل، أو شغله على مزاجه، أو مستني “كرمشة” في إيده، لقى ضالته في السيستم.
زمان كان يقولك:
– “تعالى بكرة”
– “المدير مش موجود”
دلوقتي بقى:
– “السيستم واقع”
وخلاص… لا حد يقدر يراجعه، ولا حد يقدر يحاسبه.
السؤال هنا:
لو الدولة مش مستعدة،
ولو الشركات مش قوية،
ولو البنية التحتية لسه هشة،
يبقى ليه اتحولت كل حاجة فجأة على السيستم؟
ليه المعاشات؟
ليه التأمينات؟
ليه البنوك؟
ليه التأمين الصحي؟
ليه أرزاق الناس كلها تبقى معلقة على “سيرفر” ممكن يقع، أو يتقفل، أو يتساب بمزاج موظف؟
قبل ما ننشط السيستم…كان لازم ننَشِّط العقول.
قبل ما نجيب أجهزة وبرامج وشاشات،كان لازم ندرّب الناس،ونغيّر ثقافة،ونزرع ضمير،ونعمل رقابة حقيقية.
المشكلة مش في التكنولوجيا نفسها،
المشكلة في تنفيذ منظومة رقمية بعقلية ورقية.
نحن وضعنا أحدث سيستم في إيد موظف
كان أقصى طموحه
“صباح الخير وكل سنة وانت طيب”
وكرمشة تتكرمش في إيده
أو تتدس في درج المكتب.
الحكومة لازم تفهم حاجة مهمة جدًا:
الموظف المصري أذكى من السيستم.
وعنده القدرة — لو مفيش رقابة —
يوقف كل حاجة،
ويعطل كل حاجة،
ويقول “السيستم واقع”
لحد ما السيستم “يفوق”… بالمعنى اللي هو عايزه.
التحول الرقمي مش مجرد زرار يتداس.
التحول الرقمي مسؤولية،
ومحاسبة،
ورقابة صارمة،
وخطط بديلة لما السيستم يقع،
لأن السيستم — طبيعي — ممكن يقع،
لكن مصالح الناس ماينفعش تقع معاه.
والأصعب من كل ده؟
إن رئيس الدولة يحارب لوحده.يحارب فساد جوه،ويحارب ضغوط برة،ويحارب مسؤولين،ويحارب موظفين،وفي الآخر المواطن هو اللي يدفع التمن.
كده بجد حرام.
أكيد في حل.
أكيد ينفع السيستم مايقعش.وأكيد ينفع لما يقع،البلد ما تقفش.بس الحل مش في أجهزة أكتر…الحل في ضمير أكتر.وتدريب حقيقي.ومحاسبة ما تعرفش مجاملة.
غير كده…
هنفضل كل يوم نسمع نفس الجملة:“السيستم واقع”واللي واقع بجد
هو حق المواطن.
