يا عم قولي ..المركب رايحة علي فين
وليه تايهة كده..مابين شطين
وليه احنا كده..شعبين..شعبين
ناس قاعدة..وناس راكبة..ويقولوا مش نازلين
ناس واكلة الدهب..وناس مزنوقة في رغيفين
ولو نطقنا بكلمة..يقولوا علينا خاينين
والشكوى..من قبل ماتتولد مدبوحة
ولو اتولدت..تعالي افرجك علي الدوخة
انا انسان..انسان..ومن حقي اعيش
وماتقوليش..كفاية عليك البقشيش
كل الموارد..انا ليه فيها نصيب
وطلبي مشروع..ومافيش فيه عيب
وماتقوليش اصبر..وبكره جاي بالفرحة
بكره واقف هناك مكسوف..ولابس الطرحة
الصبر نفسه زهق ..وشاور وقال باي باي
خليك ياحلو مكانك ومستني الجاي
انا بأكتب كلام والحبر من دمي
تعالي اقعد معايه..واتكلم وفهمني
ماهو ماينفعشي تعيش..وانا اموت
وتاكلني التراب..وتقولي..ده قوت
ومش ذنبي..اني اتولدت في زمن الجبروت
الناس..ماشية سكرانة من الخذلان
والحسرة كاتبة علي الجبين الف بيان
والعيال بتشاور..بس الجيب فاضي
وسيف الاحتياج..علي الرقاب ماضي
ياعم..انا لاخاين..ولاعدو لحد
كل الحكاية..اني بكتب كلام جد
الهلافيت شامخة..وعلينا بتستاسد
وبص حواليك وانت تتاكد
انا بس عايز افهم..هو ابه الموضوع
وليه مكتوب علينا الرجوع
قالوا..احنا بنبني اعلي حاجة
ومافيش في البلد محتاج ولامحتاجة
ياعم يابنا..ابني علي كيفك
بس أمانة..تخليني يوم ضيفك
الأرض ارضي..والمونة من دمي
وعرقي بلون الطين..وبمسحه بكمي
يبقي مش عيب..انك تشيل همي
وارجع واقول
انا اللي في وسط الطريق..خطوتي تاهت
حاولت الرجوع..لقيت الطريق باهت
ماعرفشي..منين يودي علي فين
قعدت مكاني..وبالدمع فاضت العين
مديت ايدي للامال…لقيتها ماتت
ليه الطريق كده..مقسوم اتنين
واللي راكبين..يقولوا مش نازلين
والناس عايشة بتزق في الأيام زق
والأيام نازلة علي دماغهم دق
والصبر زهق..وكتب علي فرار
وحلف بالطلاق..ماهو داخل الدار
البلد دي بلدي..وعشانها اموت
واللي يهنها..ح ارفع عليه الف نبوت
وارجع واقول..خلي بالك مني
مش المفروض..اني منك
.وانت مني
يبقي حقي عليك..انك تشيل همي
ماهو انا برضه..بتاع امبارح
اللي دافع وقال..هو ده الصالح
ولاهي..بقت كده..ماشية مصالح..؟؟؟
عموما..انا قربت اخلص كلامي
والحكاية..لسه فيها الف موال
وبلدي برضه ..لسه فيها رجال
والحق مش عليكوا..الحق عليه انا
علشان صدقت..ان علي ايديكوا حنشرب الهنا
اتاري الحكاية كلها كدب في كدب
ومااظنش..اني لايامكوا تاني حااحب…..
( خلص الكلام )
