كتب/ محمد الجداوي
حذّر الدكتور محمد المهدي، أستاذ الطب النفسي بجامعة الأزهر، من الاعتماد العشوائي على المهدئات أو المنشطات قبل أو أثناء الامتحانات، مؤكدًا أن هذه المواد قد تُعطي إحساسًا مؤقتًا بالهدوء أو النشاط، لكنها تؤثر بشكل سلبي على التركيز والذاكرة.
وقال المهدي، خلال حلقة برنامج “راحة نفسية”، المذاع على قناة الناس، اليوم الأربعاء: “كتير من الطلبة بيلجأوا للمهدئات ليلة الامتحان عشان يناموا، ودي رغم إنها ممكن تهدي وتساعد على النوم، لكنها بتأثر على الذاكرة بشكل كبير، خاصة المهدئات من مجموعة البنزوديازيبين، ودي لازم تكون تحت إشراف طبي دقيق”.
وأضاف: “أما المنومات الأقوى، زي مجموعة الفينوباربيتال مثلاً، فدي بلاش منها خالص، لأنها مش بس بتضعف القدرة الذهنية، دي كمان بتطفي جزء كبير من نشاط المخ، وده بيكون كارثة وقت الامتحان”.
وفيما يخص المنشطات، قال المهدي: “في ناس بتقول طب ما ناخد منشطات عشان نصحصح، وده غلط تمامًا، لأن المنشطات بتديك تنبيه زائد، بس بعده بييجي خمول شديد، وممكن تروح الامتحان تلاقي مخك واقع، أو مشوش رغم إنك صاحي ومفتح!”
ونبّه إلى خطورة تناول أي أدوية دون وصفة طبية: “ما تاخدش حاجة من نفسك، حتى لو عندك قلق أو توتر أو اكتئاب، لازم دكتور يكتب العلاج، يحدد الجرعة والوقت المناسب. المهدئات والمنشطات مش لعب، خصوصًا في وقت حساس زي الامتحانات”.
وتابع: “أفضل حالة للمخ هي حالته الطبيعية، نام كويس، كل كويس، ارتاح، ونظم وقتك، ومش لازم تلجأ لأي مادة دوائية إلا بإشراف طبي.. مخك أهم من أي حاجة تانية”.
