كتب/ محمد الجداوي
قال الدكتور محمد هاني، استشاري الصحة النفسية، إن وجود شخص سام في العلاقة قد يؤدي إلى تفكيك الشخصية وفقدان الثقة بالنفس، موضحًا أن هناك علامات واضحة تدل على هذا النوع من الشخصيات، يجب الانتباه لها مبكرًا.
وأوضح استشاري الصحة النفسية، خلال حوار مع الإعلامية مروة شتلة بحلقة برنامج “البيت”، المذاع على قناة الناس، اليوم الأربعاء: “الشخص السام دايمًا بينتقد، عمره ما بيشوف الحلو، دايمًا شايف الناقص.. مهما عملت له، مش راضي، ودايمًا بيحاول يطلع فيك العيوب، ويشتغل على ثقتك في نفسك عشان تكسر”.
وأضاف: “هو عايز يمشي العلاقة على مزاجه.. أنا الصح، أنا اللي ما بغلطش، أنا اللي كل الناس تتمنى وجودي، وكل حاجة بيعملها يحسسك إنه بيمنّ عليك”.
وأشار إلى أن أخطر ما في العلاقة مع شخص سام هو التأثير التدريجي على الإدراك والثقة، حيث يبدأ الطرف الآخر في تصديق الأكاذيب عن نفسه، قائلاً: “بيعمل غسيل مخ.. يخليك تصدق إنك مش كفاية، إنك قليل، وإنك محتاجه، وتفقد ثقتك في شكلك، في كلامك، في كل تصرفاتك”.
وأكد أن هذا النوع من الأشخاص غالبًا ما يكون مريضًا نفسيًا، نشأ في بيئة غير صحية، ويتسم بسلوك استغلالي وتملكي، مضيفًا: “هو شخص بياخد بس، بياخد اهتمامك، مجهودك، مشاعرك، ولو عمل لك حاجة بسيطة يعايرك بيها.. مع إن دي أساسيات المفروض تحصل في أي علاقة محترمة”.
وحذر قائلاً: “أسوأ حاجة إنك تبقى في علاقة وتفقد ثقتك بنفسك، الشخص اللي يوصلّك للمرحلة دي لازم تهرب منه فورًا.. لأنه شخص بيشككك في نفسك، في كل حاجة فيك، وده خطر نفسي كبير”.
