بتحكى لى الست ساميه جارتى إزاى احتفلت بيوم المراه وبتقول :
أعلنت الأحكام العرفيه فى البيت من كام يوم مع قرارى بأنى حمضى يوم المراه العالمى لنفسي واخرج مع صديقاتى نمضى اليوم سوا. وفعلا وافق الجميع واتصلت باصحابي واتفقنا على المكان واننا نتقابل بعد رجوع الأولاد من الامتحان. وبدء اليوم..
صحيت الأولاد علشان يلحقوا وقتهم وفطار سريع وتجهيز شنط المدرسهواتاكدت انهم أخدوا كل الأدوات وما نستش مراجعه المنهج كله فى عشر دقايق وتعليمات الخروج من البيت وسيل من الدعوات إن ربنا يوفقهم.. وبعد ما نزلوا عملت شاى لجوزى أللى نزل الشغل واتمنى لى يوم جميل. بسرعه كلمت الشغل وبعت أوراق مهمه كنت بخلصها فى البيت واخدت اجازة وكلمت أصحابي وأكدت المعاد.. كده كله تمام.. طب لسه بدرى يالا فرصه ادخل على المطبخ ترويق وتنظيف والذى منه.. وناخد ترويقه للشقه وتنزيل المكواه للمكوجى.. دى فرصه انى قاعده فى البيت.. وكده كله بقى تمام.. يالا استعدتيت أنا كمان للخروجه أللى بأحلم بيها.. ورجعوا الأولاد لاقيت أبنى بيعيط من صعوبه الامتحان أخدته فى حضنى وهديته وطمنته لحد ما نام فى حضنى.. وكانت بنتى هى كمان عندها حكايات وسمعتها ونصحتها تتصرف إزاى. وكلمت الشله علشان نتحرك وطبعا دخلنا فى حوار و مناقشه طويله عن المدارس والمناهج والمشاكل بتاعه الأولاد وإللى هى مشاكل المجتمع لا دى مشاكل الكوكب كله أصلا.. وبدأت الاعتذارات.. أللى خلاص نفسها اتسدت وإللى كانت ناسيه معاد تمرين ابنها لازم توصله وإللى طلع لها شغل حتقعد تعمله وإللى ابنها رجع تعبان فلازم تقعد معاه وغيرة وغيرة.. طب كده فركش.. أقوم اشمر بقا واحتفل بغدوة حلوة مع الأولاد وابوهم .. وبعد ما قعدنا واتكلمنا سوا وحكينا وضحكنا و اتخنقنا برضه الأمر ما يسلمش.. أبنى قالى هو ينفع نعمل عيد للعيد ؟ إستغربت السؤال وفهمت إن قصده انى أنا العيد.. العيد مش خروجه وبس العيد باللمه الحلوة والدفا والامان والذكريات أللى بتفضل جوانا.. ياه أحلى كلمه اتقالت لى فى اى مناسبه آه والله زى ما بقولك .. الله يجبر بخاطركم. وخلص اليوم على كده والحمد لله..
أيوة آنتى العيد
انتى يا جميله يا طيبه يا صابرة يا طموحه يا متفانيه يا قويه يا حكيمه يا ملهمه يا مبدعه يا ست الدنيا وقلبها وحضنها أيوة آنتى عيد لكل أللى حواليكى كل سنه وانتى طيبه