قالت الدكتورة مي أحمد الشحات، مدرس الاقتصاد المنزلي بجامعة حلوان، إن التحول من أسرة مستهلكة إلى أسرة منتجة لا يشترط امتلاك مهارات أو حرف معقدة، بل يكفي استغلال المهارات الحياتية اليومية البسيطة وتحويلها إلى منتجات أو خدمات يمكن تسويقها، حتى لو كانت أمورًا بسيطة مثل تحضير الخضار أو تغليف الملابس.
وأضافت مدرس الاقتصاد المنزلي بجامعة حلوان، خلال حوار مع الإعلامية زينب سعد الدين، ببرنامج “البيت”، المذاع على قناة الناس، اليوم الأربعاء: “طب أنا مش بعرف أعمل حاجة، ماعنديش مهارة أو حرفة، خلاص كده؟! لأ طبعًا، لو حضرتك ست بيت وبتقطعي خضار، يبقى تقدري تعملي مشروع بسيط لتحضير وبيع الخضروات المجهزة، لو بتعملي توابل في البيت، ممكن تبيعيها كمشروع صغير، الفكرة إنك تستغلي اللي بتعمليه أصلاً وتحوّليه لمصدر دخل”.
وشددت على أن المعرفة أيضًا يمكن أن تُباع كمنتج، موضحة: “أنا عندي معلومة؟ أقدر أبيعها، بعرف أستخدم الكمبيوتر؟ أعلّم غيري، وأكسب منها، كل حاجة ممكن تتحول لمصدر رزق لو فكرتي فيها صح”.
وفي ردها على سؤال حول من يملكون مهارة بالفعل، قالت:
“لو عندك مهارة زي الرسم أو الطبخ، أول خطوة هي دراسة السوق: هل الناس محتاجة الخدمة دي؟ هل في منافسين؟ أقدر أقدم إيه مختلف؟ مش شرط أكون دارسة اقتصاد، لكن أقدر أنزل وأسأل الناس، أعرف هما عايزين إيه، وابتدي أطور فكرتي”.
وتابع: “أكيد كلنا عندنا في العيلة حد ربّى فراخ على السطوح وبدأ يبيعها، أو بيزرع أرضه ويبيع المحصول… دي كلها أسر منتجة اعتمدت على بيئتها ومهاراتها البسيطة، بس استغلتها صح، في الريف، بيربوا دواجن، في الساحل، بيصطادوا ويعملوا منتجات سمكية، كل بيئة فيها فرصة، المهم نستغلها”.
واستكملت:”مش لازم تكون صنايعي ولا حرفي عشان تبدأ مشروعك، لو عندك مهارة حياتية، أو حتى معلومة، ابدأ بيها، وخلّي أسرتك تتحول من أسرة مستهلكة إلى أسرة منتجة”.
