أكد الدكتور عمرو الورداني، أمين الفتوى بدار الإفتاء المصرية، أن الحفاظ على الوطن لا يكون بالشعارات فقط، بل بإتقان مفهوم الوطنية، موضحًا أن “الوطنية ليست مجرد مشاعر، بل مهارات وسلوكيات تُترجم إلى أفعال تحمي الوطن وتقوّيه”.
وقال الدكتور الورداني، خلال حلقة برنامج “مع الناس”، المذاع على قناة الناس، اليوم الأربعاء: “زي ما الدولة بتقوم بدورها وتطمن الناس زي ما حصل النهارده من دولة رئيس الوزراء، إحنا كمان علينا دور، لأننا كلنا كالجسد الواحد، والمرحلة اللي إحنا فيها دلوقتي استثنائية، وبتتطلب منا ترشيد وتكافل بجد”.
واستشهد بقصة الأشعريين في عهد النبي ﷺ حين جمعوا طعامهم في إناء واحد وقسموه بينهم بالسوية، معلقًا: “رسول الله علمنا درسين من القصة دي: ترشيد الاستهلاك، والتكافل الحقيقي. وده مش خيار، ده فريضة دلوقتي. الترشيد وقت الأزمات فرض، مش مجرد سلوك مستحب”.
وأضاف: “إهدار الموارد في الوقت ده نوع من أنواع إلقاء النفس إلى التهلكة، ومن كان عنده فضل ظهر فليعد على من لا ظهر له، ده أمر أقرب للوجوب من الندب”.
وتابع: “لازم نسأل نفسنا السؤال الجوهري: إحنا شوكة في ظهر الوطن ولا لبنة في بنائه؟ هل وجودنا بيبني ولا بيهدم؟، مصر بلد مميز بأهلها، وولادها عندهم تعلق حقيقي بوطنهم، ومهما حاول البعض يسخر أو يقلل من ده، إحنا بنثبت كل يوم إننا دعاة حضارة، وإننا بنبني وسط الضجيج، لأننا ورثنا من أجدادنا حب الأرض، وزودنا عليه حب سيدنا النبي ﷺ”.
