شددت الدكتورة سماح عبدالفتاح، الاستشارية الأسرية، على أهمية الوضوح والصراحة بين الطرفين في فترة الخطوبة، لا سيما في الأمور المادية، قائلة: “مهم قوي إننا نكون واضحين مع بعض من فترة الخطوبة، يعني حدود مصروف البيت تكون معروفة، ومستوى المعيشة متفق عليه، علشان نتجنب المشاكل بعد الجواز”.

المقارنة دي ظالمة

وأضافت الاستشارية في العلاقات الأسرية، خلال حلقة برنامج “الرحلة”، المذاع على قناة الناس، اليوم الخميس: “بنبدأ صغيرين، ودي حقيقة لازم نكون فاهمينها، ومينفعش نقارن بيوت العرايس الجداد ببيوت أهالينا اللي اتكونت بعد 20 أو 30 سنة، المقارنة دي ظالمة، وبتخلق ضغط نفسي ومادي على العريس وأسرته”.

حمل كبير

وأكدت أن من الخطأ تحميل العريس من البداية تكاليف فوق طاقته لتأسيس بيت كامل بكل التفاصيل والرفاهيات، قائلة: “ده حمل كبير ممكن يقسم على العريس وأسرته، والنتيجة للأسف بتكون مزيد من التوتر والخلافات”.

مش حاجة سهلة

وتطرقت إلى نقطة محورية أخرى وهي التحول السريع من دور الزوجين إلى دور الأب والأم، موضحة: “دي مش حاجة سهلة، ولازم ليها استعداد نفسي ومادي.. مرحلة الحمل هي مرحلة إعداد وتنسيق كامل للمرحلة الجديدة، لازم نعيد توزيع وقتنا ومواردنا، ونتنازل عن حاجات كنا متعودين عليها علشان الطفل القادم”.

استعداد نفسي

وأكدت على أن فترة الحمل هي فرصة ذهبية للتحاور والتفاهم بين الزوجين، ولبناء قواعد مشتركة لتربية الطفل وإدارة الأسرة، قائلة: “التسعة شهور دول مش بس استعداد طبي، دول كمان استعداد نفسي، بنرتب فيهم حياتنا على أساس جديد”.