كتب/ محمد الجداوي
وجّه الدكتور هشام ربيع، أمين الفتوى بدار الإفتاء المصرية، رسالة صادقة ومؤثرة لكل من يشعر بالحزن أو الذنب لأنه ترك الصلاة ويريد العودة، لافتا إلى أن الرجوع إلى الله لا يحتاج منك إلا نية صادقة وقلبًا يشتاق للقاء ربه.
وأوضح خلال حلقة برنامج “مع الناس”، المذاع على قناة الناس، اليوم الثلاثاء، أن هناك ثلاث خطوات بسيطة وعميقة في نفس الوقت، لكل من كان قريبًا من ربنا وانشغل أو ابتعد، وهى “قول: (يا رب) بقلبك أو بلسانك، وقولها بأي طريقة.. أهم حاجة تكون من القلب، لأن ربنا ما بيردش حد خبط على بابه، وأول ما ييجي وقت الصلاة الجاية، هتلاقي نفسك بتقوم تتوضى وتصلي لوحدك، من غير ما حد يقولك”.
وتابع: “ثاني حاجة راجع دايرة علاقاتك، الناس اللي حواليك ليهم تأثير كبير.. شوف صحابك، زمايلك، الناس اللي بتكلمهم كل يوم، وخلى بالك الصحبة الصالحة ممكن تشدك لربنا من أقصى البعد لأقصى القرب، والعكس صحيح”.
وأضاف : “الدعاء والدعاء ثم الدعاء: ادعي في أي وقت وفي أي مكان.. ربنا بيسمع وبيستجيب، حتى وانت على المعصية”.
وتابع: “لا تحزن.. كلنا بنجاهد نفسنا، كلنا بنقع وبنقوم، المهم إنك ترجع. مافيش حد معصوم، وربنا بيحب العبد اللي بيرجع له كل مرة، صلاتك مش بس عبادة، دي صلتك بربك، افتح الباب تاني، وهتلاقيه مستنيك”.
