كتب/ محمد الجداوي
قالت سماح عبد الفتاح، الاستشارية في العلاقات الأسرية، إن من أهم مفاتيح نجاح العلاقة بين الزوجين هو مراعاة لحظات الضعف، خاصة لما تكون الزوجة في حالة استثنائية زي الحيض أو النفاس أو الحمل أو المرض.
وأضافت الاستشارية في العلاقات الأسرية، خلال حلقة برنامج “الرحلة”، المذاع على قناة الناس، اليوم الخميس: “راعي مشاعرها وخليك جنبها.. وجبر الخاطر مش رفاهية، دي ضرورة لبناء رصيد الود اللي بيتخزن في القلوب وقت الشدة”.
وأشارت إلى أهمية عدم المقارنة، قائلة: “ما تقارنيش بين جوزك وبين حد تاني، لا في الرزق ولا في الطباع، وانت كمان لا تقارن مراتك بحد لا في الشكل ولا في المهارات.. المقارنات دي بتخصم من رصيد المحبة”.
وشددت على أن التوجيه بين الزوجين أمر صحي، لكنه لازم يتم بـ”أقصى درجات اللطف والود، من غير تجريح أو كلمات جارحة”، مضيفة: “التعديل مطلوب، والتفاهم مطلوب، لكن الغضب مش رخصة لقول أو فعل أي حاجة.. لو مضايقك حاجة اتكلم فيها من بدري، الضغط بيولد الانفجار”.
وأكدت أن “الرضا والطموح ما هماش ضد بعض، ينفع تبقي راضية وسعيدة باللي عندك، وفي نفس الوقت تطمحي وتخططي لمستقبل أفضل، طول ما الزوجين بيخططوا لبكرة سوا، دي علامة أمان واطمئنان”.
وقالت: “الخروج، الضحك، الكلام، الحكايات.. دي حاجات بتغذي العلاقة، لازم تخصصوا لها وقت بعيد عن الروتين والعلاقة الخاصة.. دي روح الحياة الزوجية”.
وأضافت: “ما تنسوش معنى ‘انصر أخاك ظالماً أو مظلوماً’ في الجواز.. يعني ما تفضحوش بعض قدام الناس، لكن واجهوا بعض بالخطأ بود واحترام، ودايماً كونوا سند لبعض مش عبء على بعض”.
