البنكرياس ده عضو برنس في نفسه كده ..بيعمل اللي شايفه صح وبس ومش شاغل باله يتقال عليه هو تبع مين .
يعني بيفرز إنزيمات هامة جدا للهضم علشان كده بتوع الجهاز الهضمي قالوا البنكرياس تاعنا
قصدهم بتاعنا بس حرف الباء اتهضم في الكلا … يعني الكلام
وبدوره الناجز في إفراز الانسولين ومن ثم الخلل فيه يؤدي إلي مرض السكري
فبتوع الغدد الصماء ..قالوا ولا كلمه يا جدع إنت وهو البنكرياس ده تاعنا إحنا …طيب كلتوا حرف الباء ليه ظلمة ؟؟
لما سألته شخصيا وبقوله يا بنكرياس طيب إنت إيه نظامك في الخناقه دي ؟؟
قاللي في وسط هذا العالم المضطرب اللا متناهي والمسمي بجسم الإنسان الملئ بالتناقضات والأفكار والصراعات والانحيازات والعصارات الهضمية و الهرمونات والحامض النووي والانزيمات و الأيديولوجيات
قررت أن أنأي بنفسي عن كل هذا الاستقطاب ، وأن أفعل فقط ما أراه صوابا بعيدا عن التطرف ،والتحزبات ،والصراعات والتصنيفات، وخناقات التوك شو !!
أنا أكبر من أن أكون مجرد عضو يا شقيق !!
أحلم أن أكون رمز وفكرة الأحرار حول العالم
قلت له بصراحه إنت دماغك جامدة آخر فيصل و عجبتني آخر المصران الأعور !!
تسلم البطن اللي شالتك يا بيبو والله !!
بس يا سيدي ومن ساعتها وأنا عّمّال أدور علي طريقه أضمه بيها للمسالك !!.